Veda Vijnaana Vishtaram

Dr. Vamshi Krishna Ghanapaathi's Literary Works

वंशीकृष्ण घनपाठिनः - सारस्वतोपासनम्

गणेश कल्य स्तुतिः

Home

गणेश प्रभात स्तोत्रम्

समारम्भः

मामके मानसे भान्तं गणेशं संस्मरा.म्यहम्।

सच्चिदानन्द भासेन सूषा सुदिन.मस्तु नः।।                            1

अरुण दर्शनम्

मदीय स्वान्तसंरूढं त्वयि राग.न्निदर्शयन्न्।

उपस्थितोऽरुणो देव  दृश्यतां गणनायक।।                            2

पितृ दर्शनम्

इतो माता गौरी तदनु जनक.स्सोमसुशिराः

भवल्लीलाखेलां भुवनपितरौ द्रष्टुमनसौ।

कुमारेण स्वामिन् प्रियवचनसंलाप.मधुना

प्रियं सर्वस्यैवं कुरु गणपते सद्गुणनिधे।।                          3

अथर्वशीर्षोक्त सर्वकर्तृत्व प्रतिपादनम्

प्रभो हेरंब त्वं गणपति पदोऽथर्वणगिरा

जगत्कर्ता भर्ता विलयकृदिति ब्रह्म च नुतः।

त्वमस्यन्तर्यामी सकल जनि वृन्दस्य सुघन

गणेश त्वं कल्ये नृषु वितर चिन्तामणि शुभम्।।          4

सर्वदिक्षु रक्षणम्

ऋतं सत्यं वच्मि प्रभुवर महाशक्त सुमुख

सदा पूर्वे पश्चा.दुदगपि च दक्षेऽवसि विभो।

प्रतिष्ठामो वीक्षा.जनित.हित.मोदाय भवतः

गणेश त्वं कल्ये नृषु वितर चिन्तामणि शुभम्।।           5

मन्त्रजपदीक्षा प्रार्थनम्

अनूचानं शिष्यं तव मनुजपे मग्न.मयि भोः

              ध्रुवं त्रायेथा मां न हि भवति संशीति.रपि मे।

सदा तस्मा.दष्टाऽक्षर.वरजपे जीवय जनं 

गणेश त्वं कल्ये नृषु वितर चिन्तामणिशुभम्।।          6

सर्वान्तर्वर्तित्वम्

त्व.मात्माऽसि स्वामिन् निखिलजगत.स्साक्षिपदवीं

ध्रुवः कूटस्थो नि.र्वहसि सुलभं कोटिजनुषाम्। 

शरीरेऽपक्रान्ते  नवतनुसुखां वेदय धियम्   

गणेश त्वं कल्ये नृषु वितर चिन्तामणि शुभम्।।          7

मन्त्र जापक रक्षणम्

सदा य.स्त्वत्तत्त्वं स्मरति मनसा ध्याननिरतः

सदा संरक्षैनं मननरत.मध्यात्मपथगम्।

अवाऽध्येतारं तत्.श्रवणपर.मत्यन्तसुधिया

गणेश त्वं कल्ये नृषु वितर चिन्तामणि शुभम्।।           8

ज्ञानमयत्वात् वाङ्मयत्वम्

समुक्तानां वाचा.मसमुदित.वाकस्य मनसः

       चितो बुध्नोऽसि त्वं द्विपवदन सर्वाऽर्थघटन।

गिरां पारे भान् मे प्रतिपद.मुदेति त्वदुदितं

       गणेश त्वं कल्ये नृषु वितर चिन्तामणि शुभम्।।          9

भक्त प्रार्थनम्

असंख्याका भक्ता.स्तव पदयुगे नम्रशिरसः

इमां निष्प्रत्यूहां विरचय समारिप्सित.कृतिम्।

अहं पारं यानी.त्यनिश.मभि वाञ्छन्ति बहवः

गणेश त्वं कल्ये नृषु वितर चिन्तामणि शुभम्।।          10

निष्कामताप्राप्तेरुत्प्रेक्षा

समासीनाः कामा जननिवह.विभ्रामणचणाः

 यदासंगा.ज्जन्तु.स्सतत.मभि बोभूयत इव।

कदा भूया.दस्य प्रवरवर कामाऽवसितता? 

गणेश त्वं कल्ये नृषु वितर चिन्तामणि शुभम्।।           11

अन्तरङ्गानन्द प्रशंसा

वरीवर्त्यानन्दो नरसुर.विभिन्नो हि बहुधा

बहिर्भूत.स्सद्यो विलयति तदासक्त.मनुजान्।

परब्रह्मानन्द.स्तव मितिविहीनः प्रभजताम्            

गणेश त्वं कल्ये नृषु वितर चिन्तामणि शुभम्।।          12

बन्धक भ्रान्तिः

यथा यूपं गृह्णन् विलपति विमुञ्च त्वमिति मां

भवोद्बन्धेष्वेवं जडमति.रपीत्थं विकुरुते।

मनस्संगे मोक्षे सुशकमिति वेद्यं दिश गुरो

गणेश त्वं कल्ये नृषु वितर चिन्तामणि शुभम्।।          13

मुद्गल पुराण प्रशंसा

पुराऽऽश्रित्यैव त्वां प्रवर शुभदं मुद्गलमुनिः

प्रचक्षाणं तत्त्वं सुमहित पुराणं व्यरचयत्।

अवैतुं भद्रं तत् पठनधिय.मुद्बोधय विभो

गणेश त्वं कल्ये नृषु वितर चिन्तामणि शुभम्।।          14

सर्वजगत्प्रतीतिरिति प्रतिपादनम्

त्वदुत्पन्नो लोक.स्स्थिति.रपि लयोऽयं तव वशात्

इति स्तोत्रं देवे किल विविधरूपे भवति हि।

प्रतीतिं त्वद् यामो भुवनगण.लक्ष्माण.मभितः 

गणेश त्वं कल्ये नृषु वितर चिन्तामणि शुभम्।।          15

कर्म फलप्राप्तेः मूलाधारत्वम्

जनः कर्माऽऽसक्त्या.ऽऽचरितु.मभि कांक्षन् तव पदं 

फले मूलाऽऽधारं कलयति भवत्पूजन.विधिम्।

तनौ मूलाऽऽधाराऽधिपति.मनिशं त्वां गुणपते

गणेश त्वं कल्ये नृषु वितर चिन्तामणि शुभम्।।          16

त्रित्वातीत स्थितिः

अतीतो ब्रह्मण्य.त्रिगुण.समवस्था.त्रितयकं

तनू.स्तिस्रः काला.नतिभवसि सर्वस्व.गणराट्।

त्रिलोकी दुर्विघ्नो-द्धरणकर.शक्ते दुरितहन्

गणेश त्वं कल्ये नृषु वितर चिन्तामणि शुभम्।।          17

शक्ति त्रयाऽऽत्मकत्वम्

तवेच्छां ज्ञानं चाऽऽश्रयति किल शक्ति.र्मतिमताम्

क्रियाशक्त्या देही विचलति परिस्पन्द.कलितः।

समं लोकं शक्ते.र्गजवदन सञ्चालयसि ते

गणेश त्वं कल्ये नृषु वितर चिन्तामणि शुभम्।।          18

भगवत स्सत्त्व रूपोत्प्रेक्षा

किमुत्प्रेक्षां कुर्यां महितमिति भावं तव विभो

विरिञ्चे.र्विष्णो.र्वा शतमख.कृशान्वर्क.शशिनाम्।

कि.मोंकारं स.व्या-हृति.गत.महा-शक्ति.मिति वा 

गणेश त्वं कल्ये नृषु वितर चिन्तामणि शुभम्।।          19

गं बीजाक्षर रूपम्

गकाराऽकाराऽऽत्तं मुहु.रिद.मनुस्वार.सहितम्।

पुनर्बिन्दु.र्नादो विलसति महोदार.जठरे। 

तवाऽऽस्ते गं बीजं प्रियतम.मनन्ताऽऽप्तिफलदं

गणेश त्वं कल्ये नृषु वितर चिन्तामणि शुभम्।।          20

रूप वैचित्री

पुरो वक्रा शुण्डा बत रद इहैकः क्षत इव

  महासर्प.स्सूत्र-व्यतिकृति.महो गच्छति हृदि।

 दृशी सूक्ष्मे कर्णा-विभसमुचितौ सुन्दर वर

 गणेश त्वं कल्ये नृषु वितर चिन्तामणि शुभम्।। 21

सौन्दर्य रहस्यम्

महा.नन्तस्सारो भव.दधिकृतो यस्तु परमः      

मनस्सौन्दर्याऽऽख्यो लगति यदि सौजन्य.गुणवान्।

विनश्यं सौरूप्यं गणयति न तत्त्वैकरमणः

    गणेश त्वं कल्ये नृषु वितर चिन्तामणि शुभम्।।          22

गणपति गायत्री मन्त्रः

मनोस्ते गायत्र्या गणक ऋषि.रत्यन्तमहिमा

       भवत्तत्त्वे लीनो बहुविध.मकार्षीत् प्रिय.मिदम्।      

सदा जप्ता भावी त्वदनुगुणभावो हि किमुत      

   गणेश त्वं कल्ये नृषु वितर चिन्तामणि शुभम्।।           23

रक्त वर्ण स्वारस्यम्

उदीर्णो वर्ण.स्ते सुम.मथ सुगन्धोऽपि वसनम्

          सदा रक्त.श्चेति श्रुतिपठन.रक्तै.र्द्विजवरैः।

समं विश्वे रक्ति.र्भव.दधिगता व्यज्यत इह

   गणेश त्वं कल्ये नृषु वितर चिन्तामणि शुभम्।।          24

हस्तेषु मुद्राः

कृपा चिह्ने पाण्यो.स्तव वरद मुद्रा च रदनो

       विभासेते पाशो नियमनपर.श्चांकुशवरः।

निगृह्णीते दुष्टां धियमपि तु चेष्टां सुरपते 

   गणेश त्वं कल्ये नृषु वितर चिन्तामणि शुभम्।।          25

मूषक महिमा

अनिन्द्याऽऽख्याऽऽखुस्ते लसति वहनो भक्तसुधियां

       सदाचारं विद्यां स्वनुभवगणं नैव हरते।

पुन.र्दुष्टां बुद्धिं गिर.मपि विमुष्णाति हि सदा

       गणेश त्वं कल्ये नृषु वितर चिन्तामणि शुभम्।।          26

शूर्प कर्ण स्वारस्यम्

विभान्तौ कर्णौ ते प्रमथगण.नाथाऽच्युत विभो

       समेषां दीनानां प्रविलपन.माश्रोतुमिव तौ।

विशालौ शूर्पाभौ मम कुरुत उच्छ्राय.ममितं

  गणेश त्वं कल्ये नृषु वितर चिन्तामणि शुभम्।।   27

प्रकृति पुरुषातीत स्थितिः

जगद्धेतो.र्हेतो.स्सृजनकृति.मारब्धु.मवितुं

       अवाऽतारीः पूर्वं प्रकृतिपुरुषाभ्यां हि परतः।

विपश्यन् तत्त्वं ते प्रभवति महायोग.धनिकः

  गणेश त्वं कल्ये नृषु वितर चिन्तामणि शुभम्।।          28 

आराधन प्रकारः

यदेष्टा सन्मेधां विपुलतर.कीर्तिं शिखरिणीं

       महासम्पत्तिं वा धनदसम.तुल्यां यज सुधीः।

सुदूर्वाभि.र्लाजै-स्सघृतसमिधा मोदकशतैः

गणेशं भद्रं ते वितरति हि चिन्तामणि विभुः।।           29

ग्रहण कालिकानुष्ठानम्

कृपा.माप्तुं सूर्य- ग्रहणसमये व्रातपतये

       समेन स्वान्तेन स्नपनविधि.मुद्देशय पराम्। 

समक्षं तन्मूर्ते.र्जपन.मनु तिष्ठ प्रियकरं

गणेश.स्संभद्रं वितरति हि चिन्तामणि विभुः।।          30

सदा शुभ प्रार्थनम्

शुभं मे त्वं कुर्या दिवस.मिह चिन्तामणिविभो             

शिवा रात्रि.र्भूया.न्मम सुकर चिन्तामणिविभो

अहोरात्रे ध्यायेऽनितरमति चिन्तामणिविभो।।

गणेश त्वं भद्रं मम वितर चिन्तामणि विभो।।           31

स्तोत्र पाठ फलम्

प्रभाते सन्ध्यायां प्रपठन.सुयोग्यां स्तुति.मिमां

       मनो देवे हित्वा वदति यदि सिद्धिस्तु सुलभा।

गणेशत्वं तस्मिन् भवति किमुत प्रार्थनविधेः

गणेश.स्संभद्रं वितरति हि चिन्तामणि विभुः।।           32

विरचन प्रकारः

विराजन्ते वार्ताः हृदय कुहराऽऽन्तर्य गलिताः

       प्रभो रादेशेन प्रथन.मिह गच्छन्ति ललिताः।

तथैवेमा वाचो गुरुगणपते.र्बोधकलिताः

सदा शुद्धा बुद्धौ परिणति.मिता भान्तु कुलिताः।।              33

(सदा वंशीकृष्णात् परिणति मिता भान्तु कुलिताः।।      33)

समाप्तिः

गणेशस्य प्रसादेन सच्चिदानन्द.हेतुकम्।

रचितं स्तोत्र.मेतद्यः प्रवक्ता सन्तरेद्ध्रुवम्।।                     34

इति श्री गणेश कल्य स्तुतिः

(2012)